បន្ទាយមានជ័យ ៖ សកម្មជនមកពីគណបក្សភ្លើងទៀនបានស្ម័គ្រចិត្ត ចូលរួមជីវភាពនយោបាយជាមួយគណបក្សប្រជាជនកម្ពុជា ក្រោយពីចាញ់បោកការឃោសនា ញុះញង់ លាបពណ៌លេីការដឹកនាំរបស់រាជរដ្ឋភិបាលកម្ពុជា ខុសពីការពិត ក្រោយរួមរស់ជាមួយគណបក្សភ្លេីងទៀត។ ដោយមេីលឃេីញពីការដឹកនាំដោយភាពឈ្លាសវៃ ប៉ិនប្រសបរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សកម្មជនមកគណបក្សភ្លេីងទៀន រួមនឹងសកម្មជនមកពីគណបក្សផ្សេងៗ ចូលរួមជីវភាពនយោបាយ ជាមួយគណបក្សប្រជាជនកម្ពុជា ក្រុងសិរីសោភ័ណ ខេត្តបន្ទាយមានជ័យ។

នៅរសៀលថ្ងៃទី០៧ ខែមិថុនា ឆ្នាំ២០២៣ លោក អ៊ុ រាត្រី ប្រធានគណៈកម្មការគណបក្សប្រជាជនកម្ពុជាខេត្តបន្ទាយមានជ័យ បានអញ្ជេីញប្រកាសទទួលស្គាល បញ្ចូលសមាជិកថ្មី ដែលចូលរួមជីវភាពនយោបាយ គណបក្សប្រជាជនកម្ពុជា ក្រុងសិរីសោភ័ណ ទាំង៧សង្កាត់ ចំនួនជាង៧៣៤នាក់ នៅទីស្នាក់ការគណបក្សប្រជាជនកម្ពុជា ខេត្តបន្ទាយមានជ័យ។

នាឱកាសនោះលោក អ៊ុ រាត្រី ក៏បានលេីកឡេីងពីគុណតម្លៃនៃសន្តិភាព ស្ថិរភាពនយោបាយ និងរាល់សមិទ្ធផលនៃសង្គមជាតិ ដែលប្រជាជនកម្ពុជាសម្រេចបានក្រោមការដឹកនាំរបស់គណបក្សប្រជាជនកម្ពុជា ក្នុងដំណើរតស៊ូយ៉ាងប្តូរផ្តាច់ និងលំបាកជាទីបំផុត ដើម្បីការរស់ឡើងវិញ និងការគង់វង្សស្ថិតស្ថេរ រីកចម្រើនរបស់ជាតិរយៈពេល ៤៤ឆ្នាំមកនេះ មាន គុណតម្លៃដ៏ឧត្ដុង្គឧត្តមវិសេសវិសាលបំផុតទាំងផ្នែកសម្ភារៈ និងស្មារតីសម្រាប់ប្រជាជាតិខ្មែរទាំងមូល។

លោកបានលេីកឡេីងបន្តថា៖ «នៅក្នុងបរិបទរបស់កម្ពុជា សន្តិភាពគឺជាមូលដ្ឋាន គ្រឹះសម្រាប់ការអភិវឌ្ឍដោយចីរភាព និងអត្ថិភាពនៃលទ្ធិប្រជាធិបតេយ្យ បើគ្មានសន្តិភាព នឹងពុំមានការអភិវឌ្ឍឡើយ ហើយក៏ពុំមានលទ្ធិប្រជាធិបតេយ្យ ពិតប្រាកដដែរ»៕